MNF Legal Board chuan, February ni 5, 2026 khan MNF chuan Mizoram Sorkar Chief Vigilance Officer/Chief Secretary hnenah Complaint – Lengpui ram IAF hnena hralh chungchang CBI chhuitir tura ngenna kan thehlut a. He complaint copy hi DGP pawh pek a ni bawk. Complaint thehluh a nih thu hi chanchinbu mite hnenah kan puangzar nghal bawk a ni. Hemi ni vek hian MPCC te chuan CBI hnenah he thil kaihhnawihah vek hian FIR an thehlut bawk a nih kha.

Kan complaint thehluh bawhzui hian ZPM Sorkar chuan February ni 23, 2026 khan CBI hnena Lengpui ram chhui tura phalna consent an pek thu Notification an tichhuak a (Annexure – 1), he notification ah hian CBI Director chu copy to Sl. No. 6 ah dah a ni ve a ni. Tin, March ni 6, 2926 khan MNF MLA zahawm tak Dr. Lalthangliana Resolution putluh chu tlema siam danglamin Mizoram Legislative Assembly  “Indian Air Force (IAF) in Lengpui ram an lei dan chungchangah dan bawhchhiatna nasa tak leh corruption a awm ngei ni a lang hi Mizoram mipui duh dan leh beisei ang ngeiin Central Bureau of Investigation (CBI)-in a chhui thuai theihnan Mizoram sorkarin rang taka bawhzuiin hma la rawh se,” tiin a lo pawm tawh bawk a ni (Annexure – 2). 

Kan complaint thehluh hi kan bawhzui zel a, March ni 25 khan eng chen nge sorkarin a kalpui tawh tih zawtfiah turin Chief Secretary hmuh kan tum a, anni lam hian Vigilance dept lamah kal turin thurawn min lo pe a. Tichuan, hemi ni tlai lamah Vigilance Secretary hi kan hmu a. Complainant kan nih ang a Notification Fenruary ni 23, 20206 a an chhuah copy pawh pek kan nih ve loh thu leh a copy hi min pe ve turin kan dil a. Tin, kan complaint copy hi CBI lamah thawn thlak a nih leh nih loh kan zawt a, an thawn thla a nih chuan an thawn thlakna lehkha – Lengpui ram IAF hnena hralh chungchang chhuitir tura an ngenna te kan dil nghal bawk a. Vigilance Secretary Office lam hian an thawn thlak ngei thu leh chung lehkha copy te chu a tuk March ni 26, 2026 ah min pek tur thu an sawi a. Mahse, vawiin thlen hian kan dawng ta lo a ni. 

Hemi hnu lama kan thil hriat zui ni ta zel chu RTI hmanga zawhna, “Lengpui ram IAF hnena hralh leh lei dan chungchangah CBI chhuitir tumna a awm em? A awm anih chuan CBI hnena lehkha theh luh copy min pe thei ang em?” tih an chhannaah chuan CBI chhuitir tumna a awm thu leh CBI hnena an lehkha thehluh chu February ni 23, 2026 a CBI hnena Consent an pekna notification chauh chu an lehkha pek tur neih chu a ni ta a ni (Annexure – 3).

Vawiinah hian MNF Legal Board ten mipuite hnena kan sawi duh chu ZPM sorkar hian verther takin Lengpui ram IAF hnenah an hralh chungchangah hian bum min tum a ni tih hi a ni. CBI chhuitir tumna tak tak an nei lo a, an ngam bawk hek lo a ni tih hi mipuite hriattir kan duh a ni. CBI hnena consent an pekna notification ringawt hi CBI chhuitir tura thu tling a ni phak lo a. MNF ten CVO hnena complaint kan thehluh hi CBI Director hnenah an thawn thlak bakah chhuitir tura ngenna - forwarding mumal an siam tur a ni. MNF chuan Lengpui ram hi Mizoram Legislative Assembly-in resolution a lo pass tawh ang ngeia CBI in an chhui ngei theihnan hma kan la chhunzawm zel dawn bawk a ni.

Mizoram Assembly Session neih zawh takah khan Revenue Minister Pu B Lalchhanzova hian Lengpui ram hi IAF hnenah Pahalgam leh Sindoor issue avanga hmanhmawh taka hralh niin a sawi a. Mahse, RTI hmanga zawhna chhanna Revenue Secretariat lamin min pek sorkar – notesheet leh Revenue thusawi hi a inpersanah kan ngai bawk. Kan ram rorelna in hi dawt sawina hmun atana hmang tawh lo turin kan Revenue Minister hi kan chah bawk a ni.

MNF Legal Board chuan, Sairang Kolabari rama sipai ram lak turah ZPM mi leh sate sum leh paia hlawkna umin an hmanhlel leh mek, an ti a.

India sipaiten Kum 2012/2013 vel atanga Sairang Kolabari ram, 615.58 acres vela zau, KLP (Key Location Plan) of Infantry Battalion tana lak tumnaah tun hnaiah ZPM mi leh sate, sum leh paia hlawkna umin rem leh rem loin an inrawlh ngei niin MNF chuan kan hria a. He ramah hian Ministry of Defence hnuaiah survey tih mek a ni tih RTI chhanna tangin hriat a ni a (Annexure – 4). ZPM hotute zinga mi thenkhat an inrawlh ngei a ni tih lanna document (lehkha) pathum (3) RTI hmangin Aizawl DC Office-ah dil a ni a (Annexure – 5). Amaherawhchu, heng doc te hi Section 8 (1) (a) a security leh strategic interest khawih a nih chhuan lamin pek chhuah a ni lo thung a (Annexure – 5). RTI hmanga chhannaah a awm lo tih ni lo a, pek chhuah theih a nih loh thua min chhan avang hian a awm ngei a ni tih a chiang a ni. Chuvangin Chief Minister Pu Lalduhoma, Lok Sabha MP Pu Richard Vanlalhmangaiha leh ZPM hruaitu thenkhatte an inhnamhnawih dan hi sawifiah turin leh heng lehkha pathumte hi mipuiah tlangzarh ngam nghal turin kan phut a ni. Ram rorelnaa Pathian ram thlentir min tiamtu ZPM hruaitu lu ber berte ‘Sum leh pai ruihchilhna thlarauin a chenchilh zawk hi a vanduaithlak kan ti hle a ni.

Hei bakah hian, tunlai tawngkam lar han hawh ve dawn ta i la,  ZPM Minister leh MLA thenkhatin Serchhip District-ah sipai ram lak tur nasa takin an buaipui mek a, Delhi tlang thlengin an umzui mek tih chiang takin kan hre thawi bawk a ni. FCAA 2023 pawm a lo ni ta hi hlawkpui tumin, sum siamna hmanruaa hman tumin thapui an thawh mek niin hriat a ni bawk a ni.Lengpui ram hralh hlawkzia nghawng chhoh zel niah a ngaih loh theih loh a ni, an ti.

 Lalpianfela Chawngthu chuan, ZPM Sorkarin RTI Act an pawngsual mek hi bansan nghal rawh se, tiin.

Khua leh tui tha kan nih dawn chuan thu dik leh tha – information dik leh tha kan dawn a ngai. Thu dik leh thu tha, mihring hmasawnna lam hawi kan sawi theihnan information tha kan neih a ngai. He kan dikna leh chanvo – fundamental right hian ZPM-in sorkarna an lo chelh hnuah pawngsual a tawk nasa hle a, RTI hmanga zawhna a hun taka chhanna pek loh te, zawhna inang reng chhanna inang lo te, minister thusawi mila zawhna chhanna te pawh a awm hial niin a lang. Entirnan, RTI hmanga zawhna pakhat “December, 2018 aṭanga December 2023 thlengin Mizoram Sorkarin Land Acquisition chungchangah Social Impact Assessment (SIA) Study exemption vawi engzat nge a pek?” tih zawhna pawh vawi hnih chhanna dawn a ni a; chhanna hmasa zawkah vawi 16 tih a nih laiin chhanna hnuhnung zawkah erawh chuan vawi 69 tih a ni thung. (Annexure 6 & 7). Vawi thum min chhang ta se kan CM sawi angin vawi 120 chuang pek a ni thei tawh maithei a ni. CM sawi zah zah kha chu an chhang thleng thei rih ngang lo a ni. India danpui hnuaia khua leh tuiten kan chanvo - fundamental right (constitutional right), thu dik hre tura kan dikna hetianga dik lo taka ZPM sorkarin a suasam hi a pawi MNF chuan kan ti em em a ni. Tawp tawh se kan ti a. ZPM hi sorkar dawihzep, thudik sawi ngam loah kan ngai bawk a ni, a ti.